น ปปฺโผเฏยฺย โสเธนฺโต, ปฏิวาเต จ สงฺคเณ;
วิหารํ ภิกฺขุ ปานีย-สามนฺตา สยนาสนํฯ
[149]
นฺหาเน นฺหาตสฺส กาตพฺเพ, รงฺคปาเก จ โธวเน;
สิพฺพเน จีวเร เถเว, รชนฺโต น วเช ฐิเตฯ
[150]
เอกจฺจสฺส อนาปุจฺฉา, ปตฺตํ วา จีวรานิ วา;
น ทเทยฺย น คณฺเหยฺย, ปริกฺขารญฺจ กิญฺจนํฯ
[151]
เอกจฺจํ ปจฺฉโต กาตุํ, คนฺตุํ วา ตสฺส ปจฺฉโต;
ปิณฺฑปาตญฺจ นินฺเนตุํ, นีหราเปตุมตฺตโนฯ
[152]
กิจฺจยํ ปริกมฺมํ วา, เกสจฺเฉทญฺจ อตฺตโน;
การาเปตุํ ว กาตุํ วา, อนาปุจฺฉา น วฏฺฏติฯ
[153]
คามํ สุสานํ นิสฺสีมํ, ทิสํ วา คนฺตุมิจฺฉโต;
อตฺตโน กิจฺจยํ วาปิ, อนาปุจฺฉา น วฏฺฏติฯ
[154]
อุปฺปนฺนํ อรติํ ทิฏฺฐิํ, กุกฺกุจฺจํ วา วิโนทเย;
กเรยฺย วาปิ อุสฺสุกฺกํ, สงฺฆายตฺเตสุ กมฺมสุฯ
[155]
คิลาเนสุ อุปฏฺเฐยฺย, วุฏฺฐานํ เนสมาคเม;
วตฺตเภเทน สพฺพตฺถ, อนาทเรน ทุกฺกฏนฺติฯ
16. วจฺจปสฺสาวฏฺฐานิกนิทฺเทโส
วจฺจปสฺสาวฏฺฐานิกนฺติ –
[156]
น กเรยฺย ยถาวุฑฺฒํ, วจฺจํ ยาตานุปุพฺพิยา;
วจฺจปสฺสาวกุฏิโย, นฺหานติตฺถญฺจ ลพฺภติฯ
[157]
ปวิเสยฺยุพฺภชิตฺวา โน, สหสา ปวิเสยฺย จ;
อุกฺกาสิตฺวาวุพฺภเชยฺย, ปาทุกาสฺเวว สณฺฐิโตฯ
[158]
น กเร นิตฺถุนํ วจฺจํ, ทนฺตกฏฺฐญฺจ ขาทยํ;
วจฺจปสฺสาวโทณีนํ, น กเรยฺยุภยํ พหิฯ
[159]
กูเป กฏฺฐํ น ปาเตยฺย, เขฬํ ปสฺสาวโทณิยา;
นาวเลเขยฺย ผรุเส-นุหตญฺจาปิ โธวเยฯ
[160]
น นิกฺขเมยฺย สหสา-วุพฺภชิตฺวา น นิกฺขเม;
จปุ จปุ นาจเมยฺย, อุกฺลาปญฺจ วิโสธเยติฯ
17. อาปุจฺฉกรณนิทฺเทโส
อาปุจฺฉกรณนฺติ –
[161]
อนชฺฌิฏฺโฐว เถเรน, ปาติโมกฺขํ น อุทฺทิเส;
ธมฺมํ น กถเย ปญฺหํ, น ปุจฺเฉ น จ วิสฺสเชฯ
[162]
อาปุจฺฉิตฺวา กเถนฺตสฺส, ปุน วุฑฺฒตราคเม;
ปุน อาปุจฺฉนํ นตฺถิ, ภตฺตคฺเค จานุโมทโตฯ
[163]
วสนฺโต จ อนาปุจฺฉา, วุฑฺเฒเนกวิหารเก;
น สชฺฌาเยยฺย อุทฺเทสํ, ปริปุจฺฉญฺจ โน ทเทฯ
[164]
ธมฺมํ น ภาสเย ทีปํ, น กเร น จ วิชฺฌเป;
วาตปานํ กวาฏํ วา, วิวเรยฺย ถเกยฺย จฯ
[165]
จงฺกเม จงฺกมนฺโตปิ, วุฑฺเฒน ปริวตฺตเย;
เยน วุฑฺโฒ ส สงฺฆาฏิ-กณฺเณเนนํ น ฆฏฺฏเยติฯ
18. นคฺคนิทฺเทโส
นคฺโคติ –
[166]
นคฺโค มคฺคํ วเช ภุญฺเช, ปิเว ขาเท น สายเย;
น คณฺเห น ทเท เนว, วนฺเท วนฺทาปเยยฺย วาฯ
[167]
ปริกมฺมํ น กาเรยฺย, น กเร ปฏิฉาทิสุ;
ปริกมฺเม ทุเว วตฺถ-จฺฉาทิ สพฺพตฺถ กปฺปิยาติฯ